2024-cü il iyunun 4-də PICASP (Xəzər regionunun inkişafını dəstəkləmək məqsədilə universitet-sənaye əməkdaşlığını həyata keçirən təcrübə müəssisələri pilot kursları)  layihəsi çərçivəsində Xəzər Universiteti layihə komandasının - İnkişaf Mərkəzinin direktoru Raziyə İsayeva, İqtisadiyyat və menecment fakültəsinin dekanı Dr. Ceyhun Məmmədov, İqtisadiyyat və menecment departamentinin koordinatoru Dr.Bahadır Baysal, Tarix və arxeologiya departamentinin müəllimi Dr. Bayram Quliyev, layihə rəhbəri Səlimə Əhmədova və Keyfiyyətin Təminatı Mərkəzinin direktoru Lyudmila Sotovanın iştirakı ilə daxili iclas keçirildi.

PICASP layihəsinin əsas məqsədləri Təcrübə Müəssisəsi ilə yeni tədris metodologiyalarının işlənib hazırlanması, sahibkarlıq və KOS (Kiçik və Orta Sahibkarlıq) menecmenti üzrə kursların  təşkil edilməsi, Avropa İttifaqının tərəfdaşları ilə ən yaxşı təcrübələrin mübadiləsi,  kurrikulumun hazırlanması və məzunların məşğulluğuna maraqlı tərəflərin cəlb edilməsidir.

İclas zamanı layihənin başa çatdırılması üçün tələb olunan vəzifələr dəqiqliklə müəyyən edildi. Layihənin ümumi məqsədləri ilə uyğunluğunu təmin etmək üçün görülən işlərin gedişatı nəzərdən keçirildi. Hər bir komanda üzvü səmərəliliyi və keyfiyyəti artırmağa yönəlmiş əməkdaşlıq mühiti yaradaraq, öz fəaliyyətləri haqqında məlumat verdilər.Görüşün əsas mövzularından biri PICASP layihəsi haqqında kitabın nəşri ilə bağlı  məsələlərin müzakirəsi olub.