2024-cü il iyun ayının 25-də Xəzər Universitetinin Təbiət elmləri və mühəndislik fakültəsinin  Memarlıq və dizayn departamentinin təşəbbüsü ilə “Xəzərin Ləpələri” adlı sərgi və xeyriyə yarmarkası keçirilmişdir.

Sərgidə Memarlıq, Dizayn, Təsviri incəsənət müəllimliyi ixtisaslarında təhsil alan tələbələrin 2023-24-cü tədris ilində yerinə yetirdikləri praktiki kurs işləri və dərsdənkənar fərdi işləri sərgilənmişdir. Tədbirdə universitetin professor-müəllim heyəti və tələbələrlə  yanaşı, bir sıra  qonaqlar iştirak etmişlər.

Tələbələrin və həmçinin departamentin müəllimlərinin fərdi işləri sərgidən sonra baş tutan xeyriyə yarmarkasında satışa çıxarılmışdır. Yarmarkadan əldə olunan gəlirin uşaq evinə bağışlanması nəzərdə tutulmuşdur.

2024-cü ilin “Yaşıl Dünya Naminə Həmrəylik İli” elan edilməsi ilə bağlı sərginin bir hissəsi bu mövzuya həsr edilmişdir.

Qeyd edək ki, sərgilənən işlər ekodizayn layihələri, “Yaşıl Dünya” mövzusunda reklam plakatları, keramika məhsulları, memarlıq layihələri və maketlər, loqo və brendinqlər, rəsm, milli geyimlər kimi sahələri əhatə edirdi.