2024-cü il mayın 16-da 3-E Tərəfdaşlıq Layihəsi çərçivəsində “Şərq Tərəfdaşlığında Enerji Səmərəliliyi: Gürcüstan, Azərbaycan və Ukrayna nümunəsində” adlı onlayn vebinar keçirilib.
Tədbirdə Azərbaycan, Gürcüstan və Ukraynanın müxtəlif qurumlarından 70-ə yaxın nümayəndə iştirak edib. Tələbələr, tədqiqatçılar və siyasətçilər yuxarıda qeyd olunan Şərq Tərəfdaşlığı ölkələrində enerji səmərəliliyi ekosisteminin məzmunu haqqında qısa məlumat əldə ediblər. Gürcüstanın bu sahədə siyasəti, qanunvericilik bazası, praktikası və milli məqsədləri Dr. Margalita Arabidze tərəfindən təqdim olundu. Dr. Giorgi Abulashvili Gürcüstanda enerji səmərəliliyi məsələlərini əhatə edən müxtəlif layihə və təşəbbüslərdən danışdı. Dnepr İnfrastruktur və Nəqliyyat İnstitutunun əməkdaşı Prof. Dmytro Bosyi enerji sektorundakı mövcud mürəkkəblikləri və çətinlikləri diqqətə çatdırdı. Prof. Bosyi`nin vurğuladığı kimi, məlum çətinliyə və Ukraynanın enerji sektoruna davamlı hücuma görə, təkcə ölkənin enerji sistemi bərpa edilməli deyil, həm də yenidən təşkil olunmalıdır. Ukrayna enerji sistemi Avropa sisteminin bir hissəsidir və ona inteqrasiya etməyə davam edir.
Vebinarda daha sonra ADA Universiteti və Xəzər Universitetinin 3-E Tərəfdaşlığı layihə komandasının təqdim etdiyi Azərbaycan nümunəsi müzakirə olundu. Baş elmi işçi Dr. İnarə Yaqubova Azərbaycanda enerji sektorunun inkişafı, enerji tələb və təklifi, milli məqsədlər və fəaliyyət planları ilə bağlı mühüm hadisələri diqqətə çatdırıb.
Bundan əlavə, Xəzər Universitetinin İqtisadiyyat və menecment fakültəsinin dekanı Dr. Ceyhun Məmmədov Azərbaycanda enerji səmərəliliyi üzrə təhsil proqramları, o cümlədən universitetlərin təhsil proqramları, təlim və peşəkar inkişaf imkanları (xüsusilə Xəzər Universitetində, həm də ölkə daxilində tamamlanmış və davam etməkdə olan) haqqında məlumat verdi.