Xəzər Universitetinin Filologiya (Azərbaycan dili və ədəbiyyat) ixtisası üzrə təhsil alan 4-cü kurs  tələbələri  Hədəf Şirkətlər Qrupunda  3 aylıq təcrübə proqramını uğurla tamamlayıblar. Bu münasibətlə  qurumun  baş ofisində  2024-cü il mayın 29-da  yekun tədbir keçirilib. Biznesin idarə edilməsi üzrə baş direktor müavini Emin Sadıqov açılış nitqi ilə  çıxış edərək  təhsil müəssisələri arasındakı əməkdaşlığın zəruri olduğunu urğulayıb. Xəzər Universitetinin Dillər və ədəbiyyatlar departamentinin müdiri Dos. Dilbər Zeynalova təcrübənin praktiki əhəmiyyəti,  karyera və iş imkanları  sahəsində  rolu  barədə danışaraq, Hədəf Şirkətlər Qrupunun qurucu direktoru Şəmil Sadiq və onun komandasına təşəkkürünü bildirib.

             Təcrübə keçən  tələbələr redaktor, korrektor və dizayner kimi  üç qrupa bölünərək fəaliyyətə başlayıblar. Onlar hətta “Yeni həyat” adlı hekayə də yazaraq, onu kitab şəklində çap ediblər.

               Redaktə problemlərinin həllinə  Cavid Qədir, korrektə məsələlərinə Esmira İlyas, kitab dizayn məsələlərinə  isə Tamerlan İsmayılzadə rəhbərlik edib. Tələbələrə  oxuduqları  kitablar, irəli sürdükləri  ideya və karyera  sahəsində   istiqamət verən   Xan nəşriyyatının icraçı direktoru Səbuhi Şahmursoy onlara  fərqli mövzularda təlimlər keçib. Hədəf Şirkətlər Qrupu tabeliyində fəaliyyət göstərən Hədəf Təlim və Karyera Şirkətinin müdiri Mehdi Əliquliyev də təcrübə işlərinin koordinasiyası sahəsində  böyük əmək  sərf edib.

          Sonda Xəzər Universiteti tərəfindən hazırlanan  təşəkkürnamələr Hədəf və Xan nəşriyyatının yardıcı həyətinə təqdim olunub.