2024-cü il mayın 24-də  Xəzər Universitetində Mədəni Antropologiya və Folklor İnstitutunun (MAFI) açılış toplantısı və daha sonra simpozium iştirakçılarının şərəfinə “Ozan-aşıq" konserti təşkil edilib. Tədbiri Dos. Dilbər Zeynalova giriş sözü ilə açıb. Daha sonra söz Direktorlar və Qəyyumlar Şurasının sədri Prof. Akad.Hamlet İsaxanlıya verilib. Hamlet  İsaxanlı  institutun fəaliyyət  perspektivləri haqqında danışıb.  İnstitutun direktoru Prof.Ali Duymaz tədbirə online qoşularaq öz təbriklərini çatdırıb. Daha sonra İnstitutun koordinatoru Dos.Aynur Qəzənfərqızı və Bayram Durbilmez  simpoziuma öz münasibətlərini bildiriblər. Tədbir  Qazaxstandan akın Marat Sügirbay,  Özbəkistandan baxşı Ilhomjon Norov, Pakistandan damburacı Şahan, Gürcüstandan gəlmiş aşıq Kamandar Solexey, aşıq Əfqan Şamilov və universitetin müəllimi aşıq Ramin Qarayevin ifasında möhtəşəm  musiqi nömrələri  ilə davam edib. Sonda Dos.Iradə Xəlilova və Prof.Akad.Hamler Isaxanlının təqdimatında iştirakçılara sertifikatlar  təqdim edilib.

Xatirladım ki,  2024-cü il  fevralın 29-da  Xəzər Universitetində “Mədəni Antropologiya və Folklor İnstitutu (MAFİ)”nun təsis edilməsi haqda əmr imzalanıb. Bu İnstitut Xəzər Universitetinin  nəzdində  sərbəst bir struktur bölməsi kimi fəaliyyət göstərir. Mərkəzin direktoru  Prof. Ali Duymaz, koordinatoru  Dos. Aynur Qəzənfərqızı təyin edilib.

Professor Ali Duymaz Türkiyə Balıkesir Universitetində Fen-Edebiyat Fakültesində Türk Dili və Ədəbiyyatı Bölümünün başqanıdır. Həmçinin UNESCO Türkiyə Təmsilçiliyində komissiya üzvüdür. Daha öncə Balıkesir Universitetində prorektor, dekan vəzifələrində çalışıb.  Türk folklorşünaslığında özəlliklə dastan gələnəyi, Türk mifologiyası, Türk xalqları folkloru sahələrində bir çox dəyərli mövzularda araşdırmaları var.

Dos. Aynur Qəzənfərqızı 2017-ci ildən Xəzər Universitetində saathesabı dərs deməyə başlayıb. 2019-cu ildən isə Dillər və ədəbiyyatlar departamentinin tam ştat müəllimi kimi fəaliyyət göstərir. Daha öncə AMEA Folklor İnstitutunda və Bakı Avrasiya Universitetlərində işləyib. 2019-2021-ci illər Çinin Xbay Xarici Tədqiqatlar Universitetində (Hebei Foreign Studies University) Azərbaycan dili müəllimi kimi çalışıb. Qumuq folkloru, Türk mifologiyası və Tenqrizm sahələrində tədqiqatları var.

Mərkəzin ilkin tərkibi 28 nəfərdən ibarətdir və onun 14 nəfəri professor, 7 nəfəri dosent, 4 nəfəri PhD, 3 nəfəri ünvansızdır. Üzvlərimiz Azərbaycan, Türkiyə, Özbəkistan, Qazaxstan, Qırğızıstan, Rusiya (Dağıstan MR, Gorno Altaysk, Kırım, Tatarstan), Macarıstan, Moldova, İsveç, Gürcüstan və İraq kimi ölkələrin elm qurumlarında filoloji sahədə fəaliyyət göstərirlər. 

 İnstitut haqqında operativ və ətraflı məlumat almaq istəyənlər  təqdim etdiyim bu saytı izləyə bilər: kumafi.com