2024-cü ilin 1-2 may tarixlərində Azərbaycan Texnologiya Universitetinin İnnovasiyalar Mərkəzinin təşkilatçılığı ilə “GreenTech” Azərbaycan Startap və Yaşıl Texnologiyalar müsabiqəsi keçirildi. Müsabiqə Azərbaycan Respublikasının Prezidenti cənab İlham Əliyevin 2 fevral 2021- ci il tarixli sərəncamı ilə təsdiq edilmiş "Azərbaycan 2030: Sosial-İqtisadi İnkişafa Dair Milli Prioritetlər"i sənədinin Təmiz Ətraf Mühit və “Yaşıl Artım” ölkəsi hədəfinə və 2024-cü ilin “Yaşıl Dünya Naminə Həmrəylik İli” elan edilməsi haqqında sərəncamına əsasən keçirildi. Müsabiqənin məqsədi Azərbaycanda Texnoloji Yeniliklər və Yaşıl Texnologiyalar istiqamətində inkubasiya mühitinin inkişafına dəstək olmaq idi. Müsabiqə “Robototexnika müsabiqəsi”, “Enerji sistemləri mühəndisliyi ilə bağlı olan layihələr”, “Davamlılıq üçün Sİ Müsabiqəsi”, “Mexatronika Müsabiqəsi”, “İnsanlıq naminə olan texnologiyalar ilə bağlı olan layihələr” olmaqla 5 kateqoriyaya bölünmüşdü. Müsabiqə müddətində komandalar ideyalarını sərgi formatında təqdim edir, maraqlanan şəxslərə öz layihələri haqqında ətraflı məlumat verirdilər. Sonda isə layihəni qiymətləndirən şəxslər ayrı-ayrı komandalara yaxınlaşaraq hər kateqoriya üzrə 1,2 və 3-cü yerlərin seçimini etdirlər. 66 komandanın iştirak etdiyi bu müsabiqədə Xəzər Universitetini Kimya mühəndisliyi ixtisasında təhsil alan 2 və 3-cü kurs tələbələri Turan Hüseynzadə, Leyla Yusifzadə və Cavidan Şükürov təmsil edirdi.Onlar “Enerji sistemləri mühəndisliyi ilə bağlı olan layihələr” kateqoriyası üzrə iştirak edən komandalar arasında 3-cü yerə layiq görülərək 200 manat dəyərində mükafat qazandılar. Tədbirin  sonunda AzərSun şirkəti  tərəfindən müsabiqə iştirakçılarına hədiyyələr təqdim edildi.