2024-cü il mayın 7-də Xəzər Universitetində İslamabad şəhərində fəaliyyət göstərən Pakistan Milli Elmlər və Texnologiya Universitetinin nümayəndə heyəti ilə görüş keçirilib. Görüşdə qonaqlardan Tədqiqat, innovasiya və kommersiyalaşdırma prorektoru, Dr. Rizvan Riaz, İnnovasiya və Kommersiyalaşdırma Ofisinin (ICON) Direktoru Sana Maqbool, Korporativ Əlaqələr üzrə Baş Menecer Fawad Kashan, Texnologiya Transfer Ofisinin Meneceri Ambreen Munir, Xəzər Universitetinin rektoru Dos.İradə Xəlilova, İqtisadiyyat və menecment fakültəsinin dekanı Ceyhun Məmmədov, Təbiət elmləri və mühəndislik fakültəsinin dekanı Fəxrəndə Əfəndiyeva, Təbiət elmləri, Sənət və texnologiya yüksək təhsil fakültəsinin dekan müavini Günel Bahəddinova, Elm və mühəndislik fakültəsinin müəllimi Hafiz Mohammad Azeem Akram iştirak ediblər. Görüş universitetlər arasında akademik əməkdaşlığı artırmaq məqsədi daşıyıb və bu strateji tərəfdaşlığın bir hissəsi kimi NUST fənlərarası kəşfiyyat və innovasiyalar üçün birgə tədqiqat laboratoriyalarının yaradılmasını təklif edib. Buna cavab olaraq Xəzər Universiteti elmi fikirlərin mübadiləsini asanlaşdırmaq və canlı intellektual icma yetişdirmək üçün birgə konfransların keçirilməsini məqsədəuyğun sayıb. Görüşün sonunda hər iki qurum Anlaşma Memorandumunun (MoU) hazırlanması prosesinə başlamaq barədə razılığa gəliblər.