Azərbaycan şahmatçısı Ülviyyə Fətəliyeva Yunanıstanın Rodos şəhərində keçirilən qadınlar arasında şəxsi Avropa çempionatının qalibidir.  İtirmi yeddi yaşlı qrossmeyster bunu 10 qarşılaşmada 8,5 xal toplamaqla bacarıb. Zəka sahibi sonuncu turda Gürcüstan təmsilçisi Nino Batsiaşvili ilə heç-heçə edib.

Qeyd edək ki, Avropa Şahmat İttifaqı tərəfindən qadınlar arasında şəxsi Avropa çempionatı 2000-ci ildən təşkil olunur. Ülviyyə Fətəliyeva qadınlar arasında şəxsi qitə çempionatında qızıl medal qazanan ilk azərbaycanlı şahmatçı kimi tarixə düşüb.

Azərbaycanın Birinci vitse-prezidenti Mehriban Əliyeva rəsmi instaqram səhifəsində Ülviyyə Fətəliyevanı təbrik edib: “Əziz Ülviyyə! Parlaq qələbə münasibətilə səni ürəkdən təbrik edirəm! Əməyinə və iradənə görə çox sağ ol! Səninlə fəxr edirəm! Azərbaycana Qələbələr yaraşır!”

Gənclər və idman naziri Fərid Qayıbov Ülviyyə Fətəliyevanı qəbul edib.Gənc idmançını böyük uğuru münasibətilə təbrik edən nazir onun Avropa çempionluğunun ölkəmizdə şahmat idman növünün inkişafına töhfə verəcəyinə inandığını bildirib.

Xəzər Universitetinin kollektivi də Ülviyyə Fətəliyevanı təbrik edir və ona daha yüksək uğurlar arzulayır.