2024-cü il aprelin 25-də Xəzər Universitetinin Humanitar, təhsil və sosial elmlər fakültəsinin II kurs tələbələri Tarix və arxeologiya departamentinin müəllimi arxeoloq Orxan Zamanovun rəhbərliyi ilə Milli Azərbaycan Tarixi Muzeyinə tədris ekskursiyasında olublar.

Milli Azərbaycan Tarixi Muzeyi vaxtilə Azərbaycan milyonçusu, xeyriyyəçi Hacı Zeynalabdin Tağıyevin evi olub. Muzey ekspozisiyası tarixi binanın iki mərtəbəsini əhatələyir. Tələbələr üçün xüsusi ayrılmış bələdçi  onları Azərbaycanda ən qədim zamanlardan müasir dövrümüzə qədər olan arxeoloji-tarixi eksponatlarla tanış edib, hər birinin tarixi haqqında geniş məlumat verib. Muzeyin 2-ci mərtəbəsində olan eksponatlar isə əsasən xanlıqlar dövründən XXI əsrə qədər olan prosesləri əhatə edir. Azərbaycanın azadlığı uğrunda aparılan mübarizələr, çıxışlar eyni zamanda mədəniyyət, milli geyimlər, neftin inkişafı haqqında məlumatlar  burada yer alır. Ekskursiya tələbələr tərəfindən maraqla qarşılanıb və xatirə şəkilləri ilə yekunlaşıb.