Xəzər Universitetinin Dillər və ədəbiyyatlar departamentinin müəllimi, AMEA Nizami Gəncəvi adına Ədəbiyyat İnstitutunun Azərbaycan-Asiya ədəbi əlaqələri şöbəsinin müdiri, filologiya elmləri doktoru, Prof. Bədirxan Əhmədli 2024-cü il aprelin  16-22-də  Özbəkistanda elmi ezamiyyətdə olmuşdur. Professor öncə Özbəkistanın Fərqanə vilayətində yerləşən Fərqanə Dövlət Universitetində keçirilən Cədidlərə həsr olunmuş konfransda iştirak edərək “İsmayıl bəy Qaspıralı və Azərbaycanda cədidçilər hərəkatı” mövzusunda məruzə ilə çıxış etmişdir. Əvvəlcədən planlaşdırıldığına görə universitetin filologiya fakultəsinin I- IV kurs tələbələrinə və magistrantlara  müxtəlif mövzularda mühazirələr oxumuşdur. Onun oxuduğu “Türk dünyasında modernləşmə hərəkatı”, “Özbək cədidçiləri və Azərbaycan maarifçilərinin ortaq cəhətləri”, İsmayıl bəy Qaspıralının “Dildə, fikirdə, işdə birlik formulu yeni dönəmdə”, “Ədəbiyyat və repressiya; sovet mexanizminin ədəbiyyata nəzarət mexanizmlərinin gerçəklikləri” mövzusunda mühazirələri tələbələr və magistrantlar tərəfindən maraqla qarşılanmışdır. Konfransda Türkiyədən və Özbəkistanın müxtəlif universitetlərindən alimlər iştirak etmişdir.

            Prof. B.Əhmədli Özbəkistan Milli Universitetinin rektor yardımçısı Həmidulla Baltabayevin dəvətilə filologiya fakultəsində də “Türkçülüyün üçlü formulu” mövzusunda  mühazirə oxumuşdur. Mühazirə  universitetin müəllimləri tərəfindən maraqla qarşılanmış, mövzu ilə bağlı  professora çoxlu suallar verilmişdir.