2024-cü il aprelin 18-də Azərbaycan Dillər Universitetində Dillər və ədəbiyyatlar departamentinin müəllimi Yeqzar Cəfərlinin “Den Braunun bədii mətnlərində gerçəklik və onun postmodernist strukturu (“Da Vinçi şifrəsi”, “Cəhənnəm”, “Mələklər və şeytanlar” romanları əsasında)” adlı dissertasiya işinin müdafiəsi keçirilib.
Dissertantın müvafiq sənədləri 5718.01 Dünya ədəbiyyatı (ingilisdilli ədəbiyyat) ixtisası üzrə filologiya üzrə fəlsəfə doktoru elmi dərəcəsinin alınması üçün Azərbaycan Respublikasının Prezidenti yanında Ali Attestasiya Komissiyasına təqdim olunub.
Dissertasiyanın mövzusu müasir ABŞ yazıçısı Den Braunun romanlarında gerçəklik və onun postmodern strukturu problemlərinə həsr olunub. Tədqiqatçı mövzunu sosial, alternativ və postmodern gerçəklik şəklində üç istiqamətə bölmüş, “Den Braun bədii üçbucağı” adlı konseptual düstur müəyyən etmişdir.
Yeqzar Cəfərlinin elmi işi üzrə 6 məqaləsi, 8 konfrans materialı dərc olunub.