2024-cü il aprelin 19-unda  Xəzər Universiteti Tarix və arxeologiya departamentinin müəllimi Orxan Zamanovun təşəbbüsü və Milli Azərbaycn Tarixi Muzeyi “Arxeo” klubunun təşkilatçılığı ilə seminar təşkil olunub. Milli Azərbaycan Tarixi Muzeyində təşkil edilən  həmin seminarın mövzusu “Milli Azərbaycan Tarixi Muzeyinin arxeoloji silah kolleksiyası” olub. Məruzəçisi muzeyin Arxeologiya elmi fond şöbəsinin müdiri   Dr.Dos. Nasir Quluzadə olan həmin seminarda Xəzər Universiteti Humanitar, təhsil və sosial elmlər fakültəsinin “Tarix müəllimliyi” ixtisasında təhsil alan II kurs tələbələri dinləyici qismində iştirak ediblər. Seminarda tələbələrə silahların yaranması, dövrlər üzrə inkişafı, tipoloji təsnifatı, funksionallığı və onların savaşda tətbiqi haqqında geniş məlumatlar verilib. Həmçinin tələbələrə arxeoloji qazıntılar zamanı tapılmış bəzi silah nümunələri ilə əyani şəkildə tanış olmağa  da şərait yaradılıb. Mühazirə xarakterli həmin məruzə tələbələrin “Müharibələr tarixi” fənnindən əldə etdikləri nəzəri biliklərin möhkəmlənməsinə xidmət edib və onların  Azərbaycanın arxeoloji silahları ilə bağlı məlumatlarını genişləndirib.

Əyani dərs diskussiya şəraitində keçib və tələbələrin böyük marağına səbəb olub.