Xəzər Universiteti  İqtisadiyyat və menecment fakültəsinin IV kurs tələbəsi Şahin Əliyevin Azərbaycan Respublikasının Prezidenti İlham Əliyevin fəaliyyətinə həsr olunmuş  “İlhamlı zəfər-20” adlı kitabı “Ecoprint” nəşriyyatında çapdan çıxıb.

Kitaba  Milli Məclisin deputatı, yazıçı-jurnalist Aqil Abbas rəy vermişdir, redaktoru Amid TV.az və Yeni NeWsTv24.az saytlarının rəhbəri, jurnalist Aygün Məmmədovadır. Milli Məclisin deputatı, ilahiyyat üzrə fəlsəfə doktoru Çeyhun Məmmədov kitaba “Ön söz” yazmışdır.

Kitabın “İlham Əliyevin həyatı və siyasi karyerası”, “Qarabağ zəfəri”, “İlham Əliyevin beynəlxalq münasibətlərdə rolu”, “İlham Əliyevin Türk dünyasında rolu”, “Azərbaycan – Qoşulmama hərəkatı: İlham Əliyev liderliyi və beynəlxalq ədalət” adlı fəsillərində, həmçinin təhsil, idman və gənclər  siyasətindəki islahatlara həsr olunmuş  bölümlərində Azərbaycan Prezidentinin çoxşaxəli uğurlu daxili və xarici fəaliyyətindən bəhs olunur.

Kitabın “Prezident İlham Əliyevlə bağlı yerli və xarici ictimaiyyət, siyasət, mədəniyyət nümayəndələrinin düşüncələri” adlı geniş icmal-fəslində Azərbaycan, Türkiyə, Şimali Kipr, Bolqarıstan, Qazaxıstan, Türkmənistan, Kərkük və  Niderlandın dövlət, siyasət və mədəniyyət xadimlərinin yazıları verilmişdir. “Prezident İlham Əliyevə həsr olunan şeirlər” hissəsində Azərbaycan və Türkiyə şairlərinin şeirləri yerləşdirilmişdir.

Kitabdakı bölümlər fotoşəkillərlə müşayiət olunur. Kitab nəfis şəkildə çap edilmişdir