2024-cü il martın 29-da Xəzər Universitetinin Mərmər salonunda Azərbaycanın milli qəhrəmanı Mübariz Qurbanova həsr olunmuş tammetrajlı “Mübariz” bədii filminin təqdimatı keçirildi. Tədbirdə universitetin əməkdaşları və tələbələr iştirak edirdilər.

 AZTV və Nicat Mənalının ssenarisi və baş prodüsserliyi (Munis Production şirkəti) ilə ərsəyə gətirilmiş filmin  quruluşçu rejissoru Natiq Novruzov, Mübariz İbrahimovu canlandıran baş rol ifaçısı isə Hüseyn Əliyevdir. Filmdə ana rolu istedadlı aktrisa Flora Hüseynovaya, ata obrazı isə Xalq artisti Şamil Süleymanova həvalə olunub.

Tədbiri universitetin İctimai əlaqələr və media üzrə direktoru Əlövsət Əmirbəyli açaraq, qeyd etdi ki, Mübariz İbrahimov Azərbaycan ictimaiyyətində xalq qəhrəmanına çevrilmişdir. Biləsuvarda onun adına küçə və məktəb var. Mübariz İbrahimovu təsvir edən heykəllər ucaldılmış, onun şərəfinə xatirə lövhələri hazırlanmış, filmlər çəkilmiş, haqqında kitab yazılmış və xarici teleseriallarda bəhs edilmişdir. Lakin məhz bu gün təqdimatı olan filmdə onun uşaqlıq dövründən tutmuş sonuncu döyüşünü də əhatə edən hadisələrdən bəhs olunur.

Munis Production-un nümyəndəsi Emin Yaqubzadə filmin hazırlanması prosesindəki maraqlı məqamlardan danışaraq, qeyd edib ki, çəkilişlər qəhrəmanın doğulduğu doğma Biləsuvar rayonunda və ata evində, döyüşüb şəhadətə qovuşduğu Tərtər rayonunda yerləşən hərbi mövqedə aparılıb.

Sonra film nümayiş olunub. Dərin təəssürat doğuran film tamaşaçılar tərəfindən alqışlarla qarşılanıb.