Mən, Arif Rüstəmov Xəzər Universitenin Təbiət elmləri və mühəndisliyi fakültəsində Neft-qaz mühəndisliyi ixtisası üzrə ikinci kurs magistr tələbəsiyəm.

2023-2024-cü tədris ilinin payız semestrində Erasmus+ proqramının təşkilatçılığı ilə İtaliyanın Turin Politexnik Universitetində “Georesurslar və Geoenerji Mühəndisliyi” ixtisası üzrə mübadilə proqramında iştirak etdim.

İtaliyada oxuduğum semestr ərzində əldə etdiyim təhsil təcrübəsi mənim üçün unudulmaz oldu. Tədris semestri ərzində keçirilən dərslər mənim yeni biliklər əldə etməyimdə böyük rol oynadı. İtaliyanın yerli və əcnəbi müəllimlərinin fərqli tədris üsulu ilə keçdiyi dərslərdə iştirak etmək yeniliklər əldə etməyimə çox kömək etdi. Bu müddət ərzində neft-qaz sahəsində istifadə olunan yeni metodologiyalar haqqında geniş məlumatlar əldə etməklə yanaşı bərpa olunan enerji mənbələri haqda da yeni biliklərə yiyələndim. Mütəmadi iştirak etdiyim mühazirələrdən qazandığım biliklər yekun imtahanları uğurla başa vurmaqda yardımçım oldu. Bu baxımdan keçirdiyim bu müddət ərzində əldə etdiyim təcrübə və biliklərin gələcək təhsil və karyeramda böyük rolu olacağına çox inanıram. Tədris semestri ərzində mütəmadi olaraq təşkil olunan karyera sərgiləri, mütəxəssislərlə olan infosesiyalar mənim karyera planlamamda çox kömək oldu. Eyni zamanda Avropa təhsilinin mənim bu günə qədər olan biliklərimi nə qədər dəstəklədiyinin şahidi oldum.

Həmçinin bu proqram mənə İtaliyanın zəngin və qədim mədəniyyətini öyrənməyə və tarixi miraslarını kəşf etməyə geniş şans yaratdı. Mümkün olduğu qədər burada tarixi yerlərdə vaxt keçirdim. İtaliyanın qədim adət ənənələrini öyrənmək, tarixini bu qədər yaxından hiss etmək məni çox sevindirdi. Eyni zamanda yerli və xarici tələbələrlə hər zaman vaxt keçirməyə çalışdım. Bu baxımdan İtaliyada keçirdiyim müddət ərzində müxtəlif dostlar qazandım və fərqli mədəniyyətlərin bir hissəsi olmaq şərəfinə layiq oldum.

Düşünürəm ki, bu proqram mənim gələcəyim üçün böyük bir şans yaratdı və gələcək üçün qurduğum planları daha da dəstəklədi.