2024-cü il martın 11-də Xəzər Universitetinin “İqtisadiyyat və menecment” fakültəsi və “İqtisadçı” klubunun birgə təşkilatçılığı ilə Xəzər Universiteti və Dövlət Gömrük Komitəsi Akademiyasının tələbələri arasında elmi disput keçirilib.

Disput siyasi və elmi platformalarda tez-tez müzakirəyə çıxarılan və son illər ölkəmiz üçün də aktual sayılan “Xarici ticarət siyasəti: azad ticarət, yoxsa proteksionizm” mövzusuna həsr olunub.

Tədbirdə “İqtisadiyyat və menecment” fakültəsinin dekanı Dr. Ceyhun Məmmədov, həmçinin departamentin akademik heyəti də elmi opponent və hakim funksiyalarını icra ediblər. Öncə çıxış edən Gömrük Komitəsi Akademiyasının tələbələri dövlətin proteksionist siyasətini həm elmi-nəzəri, həm də empirik cəhətdən müdafiə edən etibarlı və əsaslı arqumentlər təklif ediblər. Sonra Xəzər Universitetinin “İqtisadçı” klubunun üzvləri Abdulla Nuriyev, Ənvər Bədəlov, Hüseyn Dadaşov və Qönçə Qurbanova azad ticarət siyasəti və onun üstünlüklərini özündə əks etdirən ciddi əsaslandırılmış nəzəri mülahizələri və real faktları qarşı tərəfə təqdim ediblər. Qarşılıqlı sual-cavab və müzakirə şəraitində keçən ikinci hissədə tərəflərin hər biri digər tərəfin arqumentlərinə əks arqumentlərlə cavab verməyə çalışıb.