2024-cü il martın 4-7-də Türkiyənin İstanbul şəhərində yerləşən Koç Universitetinin nümayəndələri Adile Özen və Pırlanta Gelani, Erasmus+ İşçi Heyətinin Mübadilə Proqramı (Erasmus+ KA171) çərçivəsində Xəzər Universiteti tərəfindən qəbul edilib.

Proqramın ilk günü Xəzər Universitetinin Mühasibatlıq ofisinin baş mühasibi Ləman Vurğun, mühasib Taliyə Hüseynzadə, Maliyyə şöbəsinin direktoru Nağı Bayramlı, Beynəlxalq əlaqələr şöbəsinin müdiri Fatimə Vəliyeva və koordinatorları Arzu Bədəlova, Turan Əlizadə və Əli Mirzəzadənin iştirakı ilə türkiyəli heyətlə tanışlıq olub.

Proqrama uyğun olaraq Arzu Bədəlovanın rəhbərliyi ilə Xəzər Universitetini daha yaxından tanıtmaq məqsədi ilə qonaqlara kiçik kampus turu təşkil olunub. Tur çərçivəsində kitabxana, laboratoriya və Nailəxanım Mədəniyyət Mərkəzinə baxış keçirilib və qonaqlara görkəmli pedaqoq Nailəxanım İsayevanın həyat və fəaliyyətini əks etdirən eksponatlar haqqında ətraflı məlumat verilib.

Martın 7-də Koç Universitetinin tələbə mühasibat meneceri Adile Özen, tələbə mühasib köməkçisi mütəxəssis Pırlanta Gelani və Xəzər Universitetinin baş mühasibi Ləman Vurğun, eləcə də Taliyə Hüseynzadə tərəfindən Tələbə uçotu üzrə Bilik Mübadiləsi ilə bağlı tədbir həyata keçirilib. Daha sonra İqtisadiyyat və menecment fakültəsi, həmçinin İctimai əlaqələr və media şöbəsi ziyarət edilib.

Proqramın davamında “Atəşgah Məbədi” Dövlət Tarix-Memarlıq Qoruğu və “Yanardağ” Dövlət Tarix-Mədəniyyət və Təbiət Qoruğuna ekskursiyalar təşkil olunub.

Proqram başa çatandan sonra nümayəndə heyətinə sertifikat və hədiyyə təqdim edilib.