2024-cü il fevralın 19-da Azərbaycan Respublikasının Dövlət Dil Komissiyası yanında Monitorinq Mərkəzində Beynəlxalq Ana Dili Günü münasibətilə tədbir keçirilmişdir. Tədbiri giriş sözü ilə açan Monitorinq Mərkəzinin direktoru Sevinc Əliyeva bildirmişdir ki, hər bir xalqın varlığını təsdiq edən başlıca amil onun dilidir. Xalqın mədəni səviyyəsi və keçdiyi tarixi yol ilk növbədə doğma dildə öz əksini tapır.

Tədbirdə Monitorinq Mərkəzinin aparıcı mütəxəssisi Gülnar İsmayılova “Hər bir xalqın milliliyini yaşadan onun dilidir”, Xəzər Universitetinin Dillər və ədəbiyyatlar departamentinin müəllimi Dr. Sevinc Qəmbərova isə “Ali məktəblərdə dilçilik fənlərinin tədrisində kadr və metodiki vəsait çatışmazlığı məsələləri” mövzularında məruzə etmişlər.

Tədbir iştirakçıların çıxışları və mövzular ətrafında müzakirələrlə başa çatmışdır.