2024-cü il martın 1-də Xəzər Universitetində Təbiət elmləri və mühəndislik fakültəsinin, Həyat elmləri departamentinin təşkilatçılığı ilə “1 Mart - Ümumdünya Mülki Müdafiə Günü"nə həsr edilən tədbir keçirilib. Tədbirdə universitetin müəllim heyəti və tələbələr iştirak ediblər. Xəzər Universitetinin əməkdaşı, ehtiyatda olan polkovnik-leytenant Mais Talışxanov tədbiri açaraq, tələbələrə mülki müdafiənin əhəmiyyəti, vəzifələri, əhalinin fövqəladə hallarda özlərini necə aparmalı olduqları barədə ümumi məlumat verib. Sonra isə tədbiri aparmaq üçün söz universitetin Humanitar, təhsil və sosial elmlər fakültəsinin tələbələri Günay Rzayevaya və Ləman Şamiyevaya verilib.

Beynəlxalq Mülki Müdafiə Təşkilatının yaranma tarixi və inkişaf yolu, Azərbaycanın bu təşkilatda rolu barədə ilk məlumatı tədbir iştirakçılarına Təbiət elmləri və mühəndislik fakültəsinin tələbəsi Səma Əhmədli təqdim edib.

“ 1 Mart - Ümumdünya Mülki Müdafiə Günü” tədbiri hər il bir mövzuya həsr edilir. Bu il isə tədbir “Mülki Müdafiə sahəsində innovasiya texnologiyaları” mövzusunu əhatə edib. Tələbə Mənzurə Qurbanlı təqdimatı ilə bu barədə hazırladığı məlumatları iştirakçılara çatdırıb. Tədbirin davamında tələbələr Sevda Cəlilova və Günay Xəlilova FH - da zədələnmə ocaqlarında və fəlakət zonalarında zərərçəkənlərə tibbi və təxliyə tədbirlərinin görülməsi haqqında geniş məlumat verməklə praktiki hərəkətlər nümayiş etdiriblər.

Tədbirin praktiki hissəsində FH zamanı xilasetmə işlərinə aid olan, insanlara ilk yardım zamanı süni tənəffüsün verilməsi və ürəyin qapalı masajının qaydaları tələbə Emil Qurbanbəyov tərəfindən, ilk yardım çantasının istifadəsi, qanaxmalar zamanı ilk yardım qaydaları tələbələr Nəzrin Nağıyeva və Rəvan Sayılov tərəfindən, sınıqlar zamanı ilk yardım qaydaları isə tələbələr Məleykə Yəhyayeva və Nuranə Verdiyeva tərəfindən nümayiş olunub. Yanıqlar zamanı xəsarət alanlara ilk yardımın göstərilməsi qaydalarını isə Humanitar, təhsil və sosial elmlər fakültəsinin tələbələri Aydan Şəmiyeva və Vüsalə İsmayılova izah ediblər.

Tələbələr Zeynəb Məmmədhənifəzadə və Şahnaz Şeydayeva müasir dövrdə istehsalatda, məişətdə müxtəlif növ kimyəvi maddələr və onların birləşmələri, zədələnmə və zəhərlənmələr zamanı ilk yardım göstərilməsi qaydaları barədə geniş izahat veriblər.

“İlk növbədə insanlar təhlükəsizlik qaydalarına əməl etməlidirlər ki, dəm qazından zəhərlənməsinlər” sözləri ilə tədbiri davam edən tələbə Adilə Abbasova dəm qazının yaranma səbəbləri haqqında ətraflı danışıb və zəhərlənmələr zamanı ilk yardım necə göstərilməlidirsə, bunu əyani olaraq nümayiş edib. Sonra istirakçılara FHN tərəfindən hazırlanmış videoçarxa təqdim olunub.

Mülki müdafiənin təminatı olan kəşfiyyat, onun xüsusi növü olan radiasiya və kimyəvi kəşfiyyat haqqında, istifadə olunan cihazlar və üsulları barədə məlumatları tələbələr Ləman Həsənli və Oruc Kərimov praktiki olaraq göstəriblər.

Universitetin MM qərargahının üzvü, Həyat elmləri departamentinin müdiri Dr. Cəmalə Eldarova tələbələr qarşısında insanların təhlükəsizliyinin təmin olunması, o cümlədən də təbii və texnogen xarakterli fövqəladə hallar zamanı əhalinin mühafizəsinin xüsusi əhəmiyyəti, universitetdə tədris olunan “Mülki müdafiə və tibbi biliklərin əsasları” fənninin vacibliyi haqqında çıxış edərək, iştirakçıların suallarını cavablandırıb.

Tədbirdə Həyat elmləri departamentinin müəllimi Pərvanə Baxşəliyeva və Kompüter elmləri departamentinin müəllimi Şəbnəm Rüstəmli çıxış ediblər və sonda tələbələrə sertifikatlar veriblər.