2024-cü il fevralın 29-da Xəzər Universitetində bədii tərcüməçi və “Qanun” nəşriyyatının əməkdaşı Aygün Əzizin bakalavr pilləsində təhsil alan tələbələrlə görüşü baş tutub. Görüş Xəzər Universitetində fəaliyyət göstərən “Tərcümə Mərkəzi”nin koordinatoru Elvin Abbasbəylinin təşəbbüsü, həmçinin İngilis dili və ədəbiyyatı departamentinin müdiri Milana Abbasovanın dəstəyi ilə keçirilib. Giriş sözü ilə tədbiri açan Milana Abbasova iştirakçılara qonaq haqqında qısa məlumat verib. Daha sonra çıxış edən Elvin Abbasbəyli tələbələr tərəfindən ingilis dilinə tərcümə olunan bir kitabın dərc olunması ilə bağlı “Qanun” nəşriyyatı ilə müqavilə imzalandığını söyləyib və mart ayında Aygün Əzizin departamentin “Bədii tərcümə” dərsində tələbələrə ustad dərsi keçəcəyini qeyd söyləyib.

Aygün Əziz öz çıxışında tələbələrə bədii tərcümə peşəsindən, bu tərcümə növünün texnikalarından, eləcə də öz təcrübələrindən bəhs edib. Sonra qonaq tələbələrin çoxsaylı suallarını cavablandırıb.