2024-cü il 26 fevral - 1 mart tarixlərində İstanbul şəhərində yerləşən Lütfi Kırdar Beynəlxalq Konqres Mərkəzində (İCEC) EURİE-2024 Təhsil Sammitinin rəsmi açılışı olub. Sammiti giriş sözü ilə Avrasiya Universitetlər Birliyinin (EURAS) prezidenti Dr. Mustafa Aydın açıb.

Sammitdə Xəzər Universitetinin İctimai əlaqələr və media üzrə direktoru Əlövsət Əmirbəyli və Beynəlxalq əlaqələr şöbəsinin müdiri Fatimə Vəliyeva iştirak ediblər. EURIE-24 Sammiti universitet nümayəndələri və ali təhsil peşəkarları üçün görüş yeridir. Hər il baş tutan bu sammitə sərgi və konfranslar daxildir. Bu isə sammit iştirakçılarına bir-birini tanımağa, yeni tərəfdaşlıq imkanlarını artırmağa imkan verir.

EURIE-2024 Sammitinin proqramına panel sessiyaları, dəyirmi masalar, tanınmış təhsil nümayəndələri ilə görüşlər, eləcə də təhsil sərgisi daxil idi. Xəzər Universitetinin nümayəndə heyəti təhsil sərgisində və digər tədbirlərdə fəal iştirak etdi.

Tədbirin ilk günü Süni İntellekt və Rəqəmsal Transformasiyanın mövcudluğunda universitetlərin rolu haqda, həmçinin beynəlmiləlləşmə və mobillik haqda panel sessiyalar həyata keçirilib. Növbəti gün EURAS və AARU (Ərəb Universitetləri Assosiasiyası) arasında Anlaşma Memorandumu imzalanıb və günün sonunda EURIE Gala şam yeməyi təşkil olunub. Tədbir çərçivəsində təşkil olunmuş Lounge Showcase'də Xəzər Universitetinin Beynəlxalq əlaqələr şöbəsinin müdiri Fatimə Vəliyeva universitetin fəaliyyət istiqamətləri haqda ümumi məlumat verib.

Sərgidə isə Xəzər Universitetinin nümayəndələri universitetin stendində universitetin fəaliyyəti və əcnəbi tələbələrin qəbul prosesi, təqaüd imkanları haqqında məlumat veriblər. Bununla yanaşı, nümayəndələr universitetin tərəfdaşlarının stendlərinə baxıblar və yeni əməkdaşlıqlar üçün digər universitetlərlə də danışıqlar aparılıb.

Tədbirdə iştirak edən rəsmi qonaqlar, YÖK Başqanı, bakanlar, millət vəkilləri, bir sıra ölkələrin təhsil nazirləri iştirak ediblər. Onlar Xəzər Universitetinin pavilyonu ilə yaxından tanış olublar. Sərgidə Azərbaycandan 6 universitet təmsil olunub.