İclası universitetin rektoru dosent İradə Xəlilova açaraq, gündəlikdəki məsələləri elmi şura üzvlərinin diqqətinə çatdırdı. İclasın sədri gündəliyin birinci məsələsi olan doktorantlar və dissertantların dissertasiya mövzularının adları və elmi rəhbərləri haqqında məlumat vermək üçün doktorant və dissertantlara söz verdi.

Hər bir doktorant və dissertant qısa şəkildə araşdıracaqları dissertasiya işlərinin aktuallığı və məqsədi barədə məlumat verdi. Şura üzvləri dissertasiya işlərinin adları ilə əlaqəli bəzi təkliflər irəli sürdülər. Təkliflər nəzərə alınaraq, dissertasiya mövzularının adları və elmi rəhbərlər təsdiq olundu.

Gündəliyin ikinci məsələsi olan imtahan sessiyasının nəticələri haqqında məlumatı Tədris işləri üzrə prorektor Məhəmməd Nuriyev təqdim etdi. O, imtahanda iştirak edən qrupların sayı, fakültələr üzrə müvəffəqiyyət və keyfiyyət göstəriciləri, cərimə və tamamlama imtahanları haqqında, eləcə də digər məsələlərlə bağlı məlumat verdi. Şura üzvləri tərəfindən müzakirələr aparılaraq, nəticələrin daha da keyfiyyətli olması üçün müəyyən təkliflər irəli sürüldü.

Gündəliyin üçüncü məsələsi olaraq Siyasi elmlər və fəlsəfə departamentinin müdiri Dr. Orxan Vəliyev tərəfindən ali məktəblərin bakalavr pilləsi üçün hazırlanmış “Azərbaycan millətşünaslığına giriş” adlı tədris metodiki vəsaitin çapa təqdim olunması barədə məlumatı şuranın elmi katibi Günel Bahəddinova diqqətə çatdırdı. İclas iştirakçıları tərəfindən məsələ ilə bağlı müzakirə aparıldı.

Elmi Şuranın növbəti məsələsi barədə iclasın sədri məlumat verdi. Bildirdi ki, Xəzər Universitetinin hər bir elmi işçisi çalışmalıdır ki, yüksək indeksləşmiş jurnallarda məqalələr çap etdirsin. Bunun üçün həmin əməkdaşlara universitet tərəfindən hər cür dəstək veriləcək.

Elmi şuranın gündəliyindəki bütün məsələlər müzakirə olundu və müvafiq qərarlar qəbul edildi.