2024-cü il fevralın 23-də Xəzər Universitetinin İngilis dili və ədəbiyyatı departamentinin və Tərcümə Mərkəzinin təşkil etdiyi II Milli Ardıcıl Tərcümə Müsabiqəsinin (II National Consecutive Interpretation Contest) seçim turu Azərbaycan Dillər Universitetindən qoşulan tələbələr arasında keçirilib. Seçim turunda 10 tələbə iştirak edib. Bu mərhələyə tərcümə ixtisasında təhsil alan və ardıcıl tərcümə qabiliyyəti güclü olan tələbələr cəlb olunub.

Xəzər Universitetinin İngilis dili və ədəbiyyatı departamentinin müdiri Milana Abbasova, Beynəlxalq Sinxron Tərcüməçilər Assosiasiyasının ilk azərbaycanlı üzvü, Fransa prezidenti və hökumətinin akkreditasiyalı tərcüməçisi, Xəzər Universitetinin Tərcümə Mərkəzinin koordinatoru Elvin Abbasbəyli və bu ali məktəbin müəllimi Zamira Qurbanovadan ibarət münsiflər heyəti tələbələri əvvəldən müəyyən olunmuş meyarlar əsasında qiymətləndirib.

Seçim turunun qalibləri müsabiqənin may ayında keçiriləcək final mərhələsində Azərbaycan Dillər Universitetini təmsil edəcəklər.