2024-cü il fevralın 21-də Xəzər Universitetində təhsil almaq istəyən əcnəbi vətəndaşlar üçün Virtual Açıq Qapı günü keçirilib.

Beynəlxalq əlaqələr şöbəsinin müdiri Fatimə Vəliyeva, şöbənin koordinatorları Arzu Bədəlova, Əli Mirzəzadə və Turan Əlizadə iştirakçıları salamlayıblar. Fatimə Vəliyeva Xəzər Universiteti haqqında təqdimat nümayiş etdirib.

Təbiət elmləri, sənət və texnologiya yüksək təhsil fakültəsinin koordinatoru Ülkər Rəsulova, İqtisadiyyat və menecment fakültəsinin koordinatoru Kəmalə Babayeva, Humanitar, təhsil və sosial elmlər fakültəsinin dekan müavini Pərvin Kərimova, Təbiət elmləri və mühəndislik fakültəsinin dekan müavini Vəfa Aslanova təmsil etdikləri fakültə və ixtisaslar haqqında geniş məlumat veriblər.

Karyera və Məzunlar Mərkəzinin direktoru Zərifə Əliyeva mərkəzin fəaliyyəti, xidmətləri və Xəzər Universitetinin məzunları haqqında ətraflı çıxış edib. Universitetin Tələbə Məclisinin (TM) prezidenti Hüseyn Musayev TM-nin fəaliyyət istiqamətləri haqqında iştirakçıları məlumatlandırıb.

Beynəlxalq əlaqələr şöbəsinin koordinatoru Arzu Bədəlova əcnəbi tələbələrin iştirakı ilə keçirilən, tədbirlərdən, səfərlərdən bəhs edib. Görüşdə Xəzər Universitetinin məzunu Imtiaz Ahmed də Xəzər Universitetindəki fəaliyyətindən və Azərbaycanda qazandığı təcrübələr barədə fikirlərini bölüşüb. Universitetin 2-ci kurs magistrantı, Əcnəbi tələbə təşəbbüs qrupunun vitse-prezidenti Aduagba Yahaya da iştirakçılara universitetdəki tədris və aktiv sosial həyatından danışıb.

2023-2024-cü tədris ili üzrə Nailəxanım təqaüdçüsü Monireh Bahrami, Nailəxanım təqaüdü və müraciəti haqqında iştirakçılara məlumat verib. Öncəki təqaüdçülərin də təəssüratlarını özündə əks etdirən videoçarx nümayiş etdirilib.

Qeyd edək ki, Nailəxanım təqaüdü magistraturada və doktoranturada təhsil almaq istəyən xanım namizədlər üçün tam maliyyələşdirilmiş təqaüd proqramıdır

Sessiyanın sual-cavab hissəsində iştirakçıların Xəzər Universitetində qəbul və təqaüdlər barədə sualları cavablandırılıb.