2024-cü il fevralın 24-də Karyera və Məzunlar Mərkəzinin və Təhsil departamentinin birgə təşkilatçılığı ilə Xəzər Universitetinin "İbtidai sinif müəllimliyi" ixtisası üzrə təhsil alan sonuncu kurs tələbələri üçün “Müəllimliyə gedən yol" mövzusunda dəyirmi masa təşkil edilib. Məruzəçilər hazırda ölkədə fəaliyyət göstərən dövlət və özəl orta ixtisas təhsili müəssisələrində ibtidai sinif müəllimləri olaraq işləyən Xəzər Universitetinin müxtəlif illər üzrə məzunları olub. Belə ki, tədbirdə 275 nömrəli tam orta məktəbin ibtidai sinif müəllimi Səbinə Məmmədbəyova, Landau məktəbinin ibtidai sinif müəllimi Fidan Seyidzadə, Kaspi Kids-in məktəbəqədər müəllimi Gülarə Atayeva, Bakı Modern Təhsil Kompleksinin ibtidai sinif müəllimi Ülviyyə Fətiyeva, XXI əsr Beynəlxalq Təhsil və İnnovasiya Mərkəzinin ibtidai sinif müəllimi Alsu Vəlizadə və Evrika liseyində ibtidai sinif və STEAM müəllimi olaraq fəaliyyət göstərən Fatimə Bədirova çıxış edərək Xəzər Universitetində əldə etdikləri bilik və bacarıqlardan, pedaqoji fəaliyyətlərindəki təcrübələrindən paylaşıblar. Onlar çıxışlarında müəllim-şagird-valideyn münasibətlərinin önəmindən, inkluziv təhsilin səmərəli tətbiqindən, təlim-tərbiyə prosesində pedaqoji ünsiyyətin önəmindən və digər məsələlərdən bəhs ediblər. Tədbir tələbələrin sual-cavabı ilə yekunlaşıb.