2024-cü il fevralın 24-də Xəzər Universitetində bütün ixtisaslarda tədris olunan Azərbaycan tarixi fənninin ilk saatı Xocalı soyqırımının 32-ci ildönümünə həsr olunub. Universitetin Tarix və arxeologiya departamentinin müəllimləri, tarix elmləri doktoru, Prof. Habil Məmmədov, tarix üzrə fəlsəfə doktorları Yaqub Məmmədov, Ramin Fətullayev, Ülviyyə Səfərova və doktorant Kəmalə Mustafayeva tələbələrə Xocalı soyqırımı və onun dünya ölkələri tərəfindən tanınması istiqamətində aparılan məqsədyönlü işlər haqqında geniş məlumat veriblər.

Qeyd etmək lazımdır ki, 1992-ci il fevralın 26-da erməni hərbi birləşmələri tərəfindən törədilən bu faciə zamanı 63-ü uşaq, 106-sı qadın, 70-i qoca olmaqla 613 Xocalı sakini qətlə yetirilib, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib, 1275 nəfər isə əsir götürülüb. Əsir götürülənlərdən 150 nəfərinin, o cümlədən 68 qadın və 26 uşağın taleyi bu günədək məlum deyil.

Azərbaycan xalqı günahsız qurbanları heç zaman unutmayacaq və haqq-ədalət uğrunda mübarizə aparacaq. Bu gün artıq Azərbaycan bayrağı Xocalıda dalğalanır və ən qısa zamanda o torpağın sahibləri öz dədə-baba yurdlarına qayıdacaqlar.