2024-cü il fevralın 9-da Xəzər Universitetinin Ekoloji Tədqiqat Mərkəzi və Abşeron Milli Parkı birlikdə Abşeron Milli Parkının yaranmasının 19 illiyi münasibətilə maarifləndirici tədbir keçiriblər. Zirə qəsəbə məktəblilərinin iştirakı ilə keçirilən tədbirdə Azərbaycanın təbiət guşələrini tərənnüm edən Azərbaycan Fotoqraflar Birliyinin təmsilçisi, tanınmış fotoqraf Aydın Mehdiyevin "Təbiətə dost ol!" adlı fərdi sərgisi nümayiş etdirilmişdir.
"Tullantını azalt" və "Təkrar emal et çağırışları isə Xəzər Universiteti Ətraf Mühit Mərkəzinin direktoru, Ekologiya və Təbii Sərvətlər Nazirliyi yanında İctimai Şuranın üzvü Rövşən Abbasovun təqdimatında yer alıb. R.Abbasov plastik tullantıların həyatımıza çox ciddi şəkildə daxil olduğunu diqqətə çatdırıb: "Tullantılar təmizlənsə, təbiət azad olacaq. Tullantılar təkcə plastik tullantılar deyil, çirkab suları, ətraf mühitə atılan karbon emissiyaları və digər təhlükəli çirkləndiricilər nəzərdə tutulur. Öncəliklə, bunun üçün tullantılardan azad olmalıyıq. Bunun üçün daha az qablaşdırılan əşyalardan istifadə edə bilərik. Əgər bu tullantılar azalmasa, gələcəyə çox ciddi ziyan dəyəcək”.
Tədbirdə Ekologiya və Təbii Sərvətlər nazirliyinin nümayəndələri, jurnalistlər və QHT əməkdaşları iştirak ediblər.