2024-cü il fevralın 7-də Sumqayıt “Dünya” məktəbinin 6,7 və 8-ci IB sinif şagirdləri, sinif rəhbərləri və biologiya müəllimləri ilə birlikdə Xəzər Universitetində olmuşlar. Universitetin rektoru Dos. İradə Xəlilova şagirdləri qəbul etmiş, universitet haqqında məlumat verərək, ali təhsilin önəmindən danışmışdır.

Şagirdlər Həyat elmləri departamentinin müəllimləri ilə görüşmüş və Hüceyrə Patologiyası Tədqiqat Mərkəzində olmuşlar. Burada şagirdlərə laboratoriyada təhlükəsizlik qaydaları, avadanlıqlar və görülən işlər haqqında məlumat verilmişdir.

Neft mühəndisliyi departamentinin müdiri Dr. Elşən Abdullayevin elmi-tədqiqat layihəsində icraçı kimi çalışmağa başlayan 1-ci kurs tələbəsi Elvin Əlizadə şagirdlərə Marsda həyatın mövcudluğunun araşdırılması haqqında danışmış, Ph metr cihazının iş prinsipini əyani olaraq nümayiş etdirmişdir.

Həyat elmləri departamentinin müdiri Dr. Cəmalə Eldarova və departamentin dosenti Cavid Ocaqi ən əhəmiyyətli ərzaq bitkisi olan buğda və onunla bağlı aparılan molekulyar bioloji tədqiqatlar haqqında maraqlı məlumatlar vermişlər. Həmçinin, departamentin müəllimi Dos. Gülbəniz Qasımova şagirdləri işıq mikroskopu ilə tanış etmiş, tısbağanın çanağından hazırlanmış preparatı nümayiş etdirmiş, pulcuğu üzərində müşahidə olunan halqalar əsasında quru tısbağasının yaşını təyin etmişlər. Mikroskop vasitəsilə qan preparatında eritrositlər də müşahidə olunmuşdur.

Bütün təcrübələr şagirdlərin böyük marağına səbəb olmuş və onların çoxsaylı sualları müəllimlər tərəfindən cavablandırılmışdır.