Konfransın işi Azərbaycan Kültür Dərnəyinin 75 illiyi münasibətilə keçirilən tədbirlə yekunlaşdı

Konfransın sonuncu iş günündə - 2024-cü il fevralın 1-də əsas tədbir M.Ə. Rəsulzadənin 1949-cu il fevralın 1-də Ankarada yaratdığı Azərbaycan Kültür Dərnəyinin 75 illiyi münasibətilə Milli Azərbaycan Tarixi Muzeyində keçirilmiş tədbir oldu.

Tədbirdə Azərbaycan Kültür Dərnəyinin İdarə Heyətinin üzvü Selcuk Önal “Məhəmməd Əmin Rəsulzadə və onun məfkurə ocağı: Azərbaycan Kültür Dərnəyi” mövzusunda məruzə etdi. Məruzə ətrafında çıxışlar oldu.

Həmin gün konfransın elmi işinə də yekun vuruldu. Qeyd olundu ki, konfransın dörd panelində Azərbaycandan və doqquz xarici (Türkiyə, Polşa, Rusiya, İsveç, İran, Almaniya, Fransa, Ukrayna, ABŞ) ölkədən otuzdan artıq mütəxəssis müxtəlif mövzularda məruzə etmişlər.

“II Beynəlxalq Rəsulzadə Qiraətləri” adlı Beynəlxalq Elmi Konfrans Azərbaycan xalqının dahi oğlunun xatirəsinə layiq yüksək səviyyədə keçirilmişdir.