Xalq şairi Vaqif Səmədoğlunun 85 illik yubileyi münasibətilə Vaqif Səmədoğlu Mərkəzi şairin şeirlərinin ən yaxşı qiraəti üçün müsabiqə elan edib. Münsiflər heyətində şair, esseist Səlim Babulla, rejissor, pedaqoq Mahmənzər Hüseynova, şair Fərid Hüseyn, aktyor, qiraətçi Kamran Yunisli təmsil olunublar. Müsabiqəyə Xəzər Universitetinin Dillər və ədəbiyyatlar departamentinin “Ritorika” klubunun üzvləri də qatılıblar.

Yanvarın 28-də görkəmli şair-dramaturqun Anım Günündə müsabiqə qalibləri Vaqif Səmədoğlu Mərkəzinə dəvət olunaraq, onlara ədibin çoxcəhətli yaradıcılığını əhatə edən kitab və şeirlərinin səsləndirildiyi disklər hədiyyə olunub. Tədbirin sonunda münsiflər heyətinin üzvləri müsabiqə iştirakçılarına bədii qiraət üzrə faydalı tövsiyələr veriblər və onları maraqlandıran sualları cavablandırıblar.

Vaqif Səmədoğlu Mərkəzinin sədri Dr. Nüşabə Vəkilova şairə məxsus olan təsbehi Xəzər Universitetinin IV kurs tələbəsi Sənur Yaqubova, Vaqif Səmədoğlunun qələmə aldığı pritçalardan ibarət olan “Gürzəçöl yazıları” kitabını isə tədqiqata cəlb olunması üçün klubun koordinatoru Dr.Sevinc Qəmbərovaya hədiyyə edib.