2023-cü il dekabrın 26-da Elm və Təhsil Nazirliyinin təşkilatçılığı ilə Four Seasons hotelində Azərbaycanda Beynəlxalq Təhsil İmkanları Forumu keçirilib. Forumda yerli ali təhsil müəssisələrinin rektorları, təhsil işçiləri, beynəlxalq ekspertlər və əcnəbi tələbələr, Elm və Təhsil nazirinin müavini Həsən Həsənli, Elm və Ali Təhsil üzrə Dövlət Agentliyinin direktoru Ülkər Səttarova, Xarici İşlər Nazirliyinin Beynəlxalq İnkişafa Yardım Agentliyinin rəisi Elməddin Mehdiyev, Dövlət Miqrasiya Xidmətinin Miqrasiya proseslərini tənzimləmə baş idarəsinin rəis müavini Tamilla Hacıyeva, Xəzər Universiteti Beynəlxalq əlaqələr şöbəsinin müdiri Fatimə Vəliyeva, koordinatorlar Turan Əlizadə və Arzu Bədəlova iştirak ediblər.

Forumun keçirilməsində məqsəd hər ilin yekununda yerli ali təhsil müəssisələri ilə keçirilən ənənəvi görüşün daha produktiv modelinə keçid, 2023- 2024-cü tədris ili üzrə əcnəbi tələbələrin Azərbaycanda təhsilinə dair hesabatın təqdim olunması, universitetlərin beynəlmiləlləşmə sahəsində inkişafını müzakirə etmək, eləcə də 2023-cü il üçün Fəaliyyət Planı üzrə xarici tələbələrlə iş sahəsində fərqlənən universitetləri fərqləndirmək olub.

Qeyd edək ki, Xəzər Universiteti Azərbaycanda əcnəbi tələbələrin mobilliyi baxımından yüksək göstəricilərinə və ölkənin ali təhsil müəssisələrinin reytinqində yüksək nailiyyətləri ilə fərqləndiyinə görə Elm və Təhsil Nazirliyi tərəfindən "Təşəkkürnamə" ilə mükafatlandırılıb.