2023-cü il dekabrın 20-də Azərbaycan Respublikasının Təhsil İnstitutunda “Azərbaycan dili” fənn kurikulumunun təkmilləşdirilməsi” (2023) mövzusunda elmi-praktik görüş təşkil olunmuşdur. Görüşə Azərbaycan Milli Elmlər Akademiyasından, Bakı Dövlət Universitetindən, Azərbaycan Dövlət Pedaqoji Universitetindən, Sumqayıt Dövlət Universitetindən, Xəzər Universitetindən, Dövlət İmtahan Mərkəzindən mütəxəssislər dəvət olunmuşdur.

Tədbiri giriş sözü ilə Təhsil standartları və proqramları şöbəsinin müdiri Mənsur Məhərrəmov açaraq, görüşün məqsədini iştirakçıların diqqətinə çatdırıb. Prof. Rafiq İsmayılova “Azərbaycan dili” fənn kurikulumunun hansı istiqamətdə təkmilləşdirilməsi haqqında geniş məlumat verərək, ekspertləri məlumatlandırdı. Mövzunun təqdimatı bitdikdən sonra müxtəlif təhsil ocaqlarından dəvət olunmuş mütəxəssislərə söz verilərək, geniş müzakirələr aparıldı. Xəzər Universitetindən fil.ü.f.d. İlkin Əsgərov və fil.ü.f.d. Almaz Bədəlova mövzunun aktuallığını, orta məktəblərdə “Azərbaycan dili” fənninin tədrisi işinin inkişafında əhəmiyyətli olacağını bildirərək, mövzu ilə bağlı təklif və iradlarını, tövsiyələrini diqqətə çatdırdılar.

Sonda təşkilatçılar deyilmiş fikirlərə münasibət bildirib, məzmunla bağlı rəylərin yazılı formada yollanılmasını qeyd etmiş və görüşü yekunlaşdırmışlar.