2023-cü il dekabrın 18-də Xəzər Universitetinin Mərmər salonunda Tələbə Məclisinə (TM) prezident, vitse-prezident və senat üzvlüyünə namizədlərin seçkisi keçirilib. Seçki prosesində tələbələrlə yanaşı, universitetin rektoru, fakültə dekanları və müavinləri, Keyfiyyət təminatı mərkəzinin direktoru və əməkdaşları, İctimai əlaqələr və media üzrə direktor iştirak ediblər.

Tələbə Məclisinin prezidenti və vitse-prezidentliyinə seçki universitetin 5 fakültəsi üzrə müxtəlif ixtisaslarda təhsil alan əcnəbi və yerli tələbələrdən olan 12 namizəd arasında aparılıb. Qeyd edək ki, bütün fakültələr ayrı-ayrılıqda konfranslar keçirərək, bu tələbələrin namizədliyini irəli sürüb.

Təbiət elmləri və mühəndislik fakültəsinin dekanı Fəxrəndə Əfəndiyeva çıxış edərək, seçki prosesi haqqında iştirakçıları məlumatlandırıb və Tələbə Məclisinin bu günə qədərki fəaliyyətindən danışıb.

Seçki prosesinin aparılması üçün səlahiyyəti başa çatmaqda olan TM-nin bir və fakültə dekanlıqlarından nümayəndələr olmaqla ümumilikdə beş nəfərdən ibarət hesablama komitəsi yaradılıb. Bundan sonra prezidentliyə namizəd olan 12 tələbənin platforma təqdimatları dinlənilib, sonra isə fakültələrin müxtəlif ixtisaslarını təmsil edən 54 tələbənin gizli səsverməsi əsasında seçim prosesi təşkil olunub və Hesablama Komitəsi tərəfindən səslər hesablanaraq, qalib elan edilib. Nəticə etibarilə Təbiət elmləri və mühəndislik fakültəsinin Mexanika mühəndisliyi ixtisasının II kurs tələbəsi, Heydər Əliyev adına təqaüdçü Hüseyn Musayev 12 səs toplayaraq, Tələbə Məclisinin prezidenti, 11 səs toplayan İqtisadiyyat və menecment fakültəsinin İqtisadiyyat ixtisasının II kurs tələbəsi Abdulla Nuriyev vitse-prezident, tələbələr arasında Senata seçim prosesində isə 11 nəfər Senata üzv seçilib.

Seçki prosesi başa çatandan sonra universitetin rektoru İradə Xəlilova, eləcə də İctimai əlaqələr və media üzrə direktoru Əlövsət Əmirbəyli çıxış edərək, Tələbə Məclsinin üzvlərinə gələcək fəaliyyətlərində uğurlar arzulayıblar.