Xəzər Universitetinin İdarəetmə və tələbə işləri üzrə prorektoru İsaxan İsaxanlı və Musiqi və incəsənət departamentinin müdiri Zülfiyyə Sadıqova dekabrın 11-də Naxçıvanda keçirilən İNFOTUR-da iştirak etdilər.
İNFOTUR “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı” çərçivəsində özəl təhsil müəssisələrinin yaradılması üçün sahibkarlar arasında təşviqat işlərinin aparılması məqsədilə keçirilirdi.
İNFOTUR-un açılışında Naxçıvan Muxtar Respublikasının rəhbər şəxsləri - Naxçıvan Muxtar Respublikası Baş nazirinin müavini, təhsil naziri vəzifələrini icra edən, iqtisadiyyat naziri vəzifələrini icra edən, maliyyə naziri vəzifələrini icra edən və digər rəsmi şəxslər və qonaqlar, eləcə də Bakıda fəaliyyət göstərən bir sıra özəl təhsil müəssisələrinin və təhsillə bağlı müxtəlif təşkilatların nümayəndələri iştirak edirdilər.
Tədbirdə çıxış edən rəsmi şəxslər Naxçıvan Muxtar Respublikasında özəl təhsil müəssisələri açmaq istəyən sahibkarlara hərtərəfli şəraitin yaradılacağını və onlara rəsmi orqanlar tərəfindən hər cür dəstək göstəriləcəyini qeyd etdilər.
Sonra sahibkarların fikir və təklifləri dinlənildi, onları maraqlandıran suallar cavablandırıldı.
Tədbirdə Xəzər Universitetinin İdarəetmə və tələbə işləri üzrə prorektoru İsaxan İsaxanlı çıxış edərək, Xəzər Universiteti və “Dünya” məktəbi haqqında məlumat verdi, “Dünya” məktəbinin Naxçıvan Muxtar Respublikasında fəaliyyət göstərmək arzusunu dilə gətirdi və bu istiqamətdə tədris üçün bina və ya uyğun torpaq sahəsinin ayrılması, tikintiyə icazə və uyğun şərtlərlə kredit verilməsi kimi məsələlərin vacibliyindən danışdı. Qaldırılan bu məsələlər ətrafında təhsil naziri vəzifələrini icra edən, nazir müavini Elxan Nəcəfov fikrini bildirdi, məsələ ilə bağlı uyğun təşkilatlarla fikir mübadiləsi aparılmasının mümkünlüyünü və vacibliyini qeyd etdi.