Siyasi elmlər və fəlsəfə departamentinin müdiri Dr. Orxan Vəliyev 2023-cü il noyabrın 30-da Azərbaycan Respublikası Elm və Təhsil Nazirliyinin dəstəyi və “Bir Könüllü” Tələbələrin Əməkdaşlığı İctimai Birliyinin təşkilatçılığı ilə həyata keçirilən “Bir Gələcək” təşəbbüsü çərçivəsində məzunu olduğu İmadəddin Nəsimi adına Gəncə şəhər 44 nömrəli məktəb-lisey kompleksi orta məktəbində şagirdlərə təlim keçmişdir.

Dr. Vəliyev təlimdə öz təhsil təcrübəsindən məlumat verməklə yanaşı, ixtisas seçimi məsələsində də şagirdlərlə söhbət etmişdir. Təlim şagirdlərin suallarının cavablandırılması və şagirdlərə sertifikatların verilməsi ilə tamamlanmışdır.

“İctimai fəallığın artırılması ilə dəyişim əməkdaşlığı” layihəsi çərçivəsində keçirilən “Bir Gələcək” təşəbbüsünün məqsədi şagirdləri gələcək ixtisas seçimi və karyera planlaması mövzusunda maarifləndirmək, dövlət və özəl sektorda çalışan, peşəkar həyatda uğur qazanan şəxslərlə şagirdlərin görüşünü təşkil edərək fərdi inkişafa dəstək olmaqdır.