2023-cü il dekabrın 7-də Xəzər Universitetində ICMPD-nin (Miqrasiya Siyasətinin İnkişafı üzrə Beynəlxalq Mərkəz) Azərbaycandakı nümayəndəliyi ilə əməkdaşlıq çərçivəsində xarici tələbələrin sosial və hüquqi maarifləndirilməsini təmin etmək məqsədi ilə İnteqrasiya proqramı haqqında məlumat sessiyası keçirilib. Sessiyada universitetinin Beynəlxalq əlaqələr şöbəsinin müdiri Fatimə Vəliyeva, Beynəlxalq əlaqələr üzrə koordinator Turan Əlizadə, qarşı tərəfdən isə ICMPD-nin eksperti Eşqin Tanrıverdi, Layihələr üzrə məsul şəxs Lamiyə Rzayeva-Əhmədli, Azərbaycanla yerdəyişmə üzrə tərəfdaşlığın həyata keçirilməsinə dəstək layihəsinin milli inteqrasiya məsləhətçisi Gülnarə Pənahova iştirak etmişdir. İştirakçılar layihə çərçivəsində ICMPD-nin fəaliyyət istiqamətləri və əcnəbi tələbələrin yararlana biləcəyi inteqrasiya proqramının xidmətləri barədə məlumat veriblər.

Məlumatlandırma sessiyasında ICMPD-nin İnteqrasiya Proqramı çərçivəsində Azərbaycan Mərkəzi Bankının Maliyyə savadlılığı şöbəsinin aparıcı mütəxəssisi Pərvin Qəhrəmanova da iştirak edib. O, maliyyə savadlılığının əsasları ilə yanaşı, əcnəbi tələbələr üçün Azərbaycanda bank məhsullarına çıxış və istifadənin yolları barədə də ətraflı məlumat verib.