2023-cü il noyabrın 14-də əcnəbi tələbələrin ictimai fəallığını təmin etmək, eyni zamanda, onların ətraf mühitin mühafizəsi istiqamətində ölkə miqyasında həyata keçirilən tədbirlərlə yaxından tanış olması məqsədilə 20-dən çox tələbə üçün Azərbaycan Respublikası Elm və Təhsil Nazirliyi tərəfindən “Təmiz Şəhər” sənaye sahələrinə məlumat turu təşkil olunub. Turda Azərbaycanda təhsil alan 10-dan çox ali təhsil müəssisəsindən əcnəbi tələbələr iştirak ediblər. Onların arasında Xəzər Universitetində təhsil alan iki əcnəbi tələbəmiz - Aldila Qonita Putri Aulia və Abdou Elfatah Djoumoi Moiboi də olub.

Məlumat turu çərçivəsində “Təmiz Şəhər”in işçiləri tələbələrə “Balaxanı Bərk Məişət Tullantılarının Çeşidlənməsi Zavodu”nda tullantıların çeşidlənməsi və təkrar emal müəssisələrinə göndərilməsi, bərk məişət tullantılarının təkrar emalı və yandırılması prosesi haqqında məlumat veriblər.

Sonda tələbələri maraqlandıran suallar cavablandırılıb.