2023-cü il 28 oktyabr-3 noyabr tarixində ERASMUS+ PICASP (Xəzər regionunun inkişafını dəstəkləmək məqsədilə universitet-sənaye əməkdaşlığını həyata keçirən Təcrübə Müəssisələri pilot kursları) layihəsinin maliyyə dəstəyi ilə “MİRAS” Mədəni İrsin Öyrənilməsinə Kömək İctimai Birliyi və Belçika Türk Dərnəkləri Birliyi tərəfindən idman, sağlam həyat, motivasiya kimi mövzularda Belçika və Azərbaycandan olan gənclər üçün maarifləndirici təlimlər, eyni zamanda ölkəmizlə tanışlıq turları keçirilib.

Xəzər Universitetinin İqtisadiyyat və menecment fakültəsinin tələbələri Şahin Əliyev, Fərid Babayev, Ziya Əlizadə, Cəlal Yaqub və Çingiz Ağayev bu təlimdə fəal iştirak ediblər.

Oktyabrın 29-da hər iki ölkəni təmsil edən gənclər təlim prosesində Türkiyə Cümhuriyyətinin 100 illiyini qeyd edərək, İstiqlal marşını birlikdə ifa ediblər. Bayram əhval-ruhiyyəsi gün boyu davam edib. Tədbiri “MİRAS” Mədəni İrsin Öyrənilməsinə Kömək İctimai Birliyinin sədri, tarix üzrə fəlsəfə doktoru Fariz Xəlilli açaraq, günün proqramını elan edib. Belçika Türk Dərnəkləri Birliyinin sədri Rüfət Can öz çıxışında bu təlimlərin gənclərimizin gələcək həyat yollarına işıq saçacağına ümid bəslədiyini ifadə edib.

Layihə çərçivəsində gənclər oktyabrın 30-da Ağsu rayonunun Gəgəli kəndində “Tərəkəmə yurdu” və Ağsu şəhərində orta əsr arxeoloji qazıntı ilə tanış olaraq, “Çilingağac” milli oyununu izləyiblər. Oktyabrın 31-də isə gənclər Gəncə şəhərində Azərbaycan Dövlət Bədən Tərbiyəsi və İdman Akademiyasının müəllimi Xəyyam Orucovun “Milli İdman Oyunları” haqqında geniş təqdimatını dinləyiblər və Gəncənin gəzməli-görməli yerləri ilə tanış olublar. Noyabrın 1-də isə onlar təbiətimizin gözəl incisi olan Göygöl Milli Parkına baş çəkiblər və buradakı alman evlərinə tamaşa ediblər.

Bir həftəlik proqramın nəticəsi olaraq tələbələr Youthpass sertifikatı ilə təltif olunublar.