2023-cü il noyabrın 17-də Latviyanın Azərbaydandakı səfirliyində Latviya Respublikasının 105-ci ildönümünə həsr olunmuş tədbir keçirilib. Səfirliyin dəvəti ilə tədbirdə Xəzər Universitetinin İqtisadiyyat və biznes yüksək təhsil fakültəsinin dekanı İnqilab Əhmədov və Beynəlxalq əlaqələr şöbəsinin müdiri Fatimə Vəliyeva da iştirak etmişlər. Mərasim Azərbaycanın və Latviyanın Dövlət himnlərinin ifası ilə başlanıb.

Latviyanın tarixinə, keçdiyi inkişaf yoluna nəzər salan səfir Edqars Skuya Azərbaycan-Latviya əlaqələrinin müxtəlif sahələrdə dinamik inkişafından danışıb. İki ölkə arasındakı diplomatik əlaqələrin 2024-cü ildə 30 illiyinin qeyd olunacağını diqqətə çatdıran səfir, münasibətlərin strateji əməkdaşlıq səviyyəsinə yüksəldiyini vurğulayıb.

"Latviya həm də Azərbaycanın Avropa İttifaqı ilə əlaqələrinin inkişafına dəstək göstərir" deyən səfir iki ölkə arasındakı əlaqələrin beynəlxalq arenada da uğurla inkişaf etdiyini bildirib.

Sonra çıxış edən xarici işlər nazirinin müavini Samir Şərifov Azərbaycan hökuməti adından Latviya xalqını Respublikanın yaranmasının 105-ci ildönümü münasibətilə təbrik edib. Azərbaycan-Latviya münasibətlərinin strateji əhəmiyyət daşıdığını qeyd edən nazir müavini iki ölkənin bir-birini hər zaman dəstəklədiyiini qeyd edib.