Xəzər Universitetinin koordinatoru olduğu Azərbaycanda İnstitusional Repozitoriyalar Şəbəkəsi vasitəsilə Tədqiqat Potensialının İnkişaf Etdirilməsi (DIRNA) adlı Erasmus+ layihəsi çərçivəsində 2023-cü il noyabrın 15-17-də İzmir Yüksək Texnologiya İnstitutunda birinci təhsil turu keçirilmişdir. Təhsil turunda Xəzər Universiteti ilə bərabər 7 tərəfdaş Azərbaycan universiteti (Bakı Dövlət Universiteti, Azərbaycan Texniki Universiteti, Azərbaycan Dövlət Gömrük Komitəsinin Akademiyası, Gəncə Dövlət Universiteti, Naxçıvan Dövlət Universiteti, Lənkəran Dövlət Universiteti, Mingəçevir Dövlət Universiteti) iştirak edib. Xəzər Universiteti tədbirdə Kitabxana İnformasiya Mərkəzinin direktoru Tatyana Zaytseva, direktor müavini Aytac Misgərli və Komplektləşdirmə müdiri Cəmilə Quliyeva ilə təmsil olunub.

Təlimin məqsədi Azərbaycan ali təhsil müəssisələrində araşdırılan keyfiyyətli tədqiqat işlərinə əlçatanlığın təmin edilməsi üçün Türkiyə təcrübəsindən yararlanmaq idi. Təhsil turu dövründə İzmir Yüksək Texnologiya İnstitutunun kitabxanasının təşkilatçılığı ilə GCRIS Texniki İnfrastruktur, Açıq Elmə Baxış, Türkiyədə Açıq Elmin İnkişafı, Türkiyədə və İzmir Yüksək Texnologiyalar İnstitutunda İnstitusional Arxivlərin İnkişafı mövzularında təqdimatlar keçirilmişdir.

Tur çərçivəsində Azərbaycan universitetlərinin nümayəndələri İzmir Yüksək Texnologiya İnstitutunun rektoru Prof. Yusuf Baranla görüşüblər. Görüşdə iki qardaş ölkə arasında ali təhsil müəssisələrinin əməkdaşlığı haqqında müzakirələr aparılıb.