2023-cü il noyabrın 18-də tanınmış özbək şərqşünası, Amerikanın Hofstra Universitetinin professoru, tarix elmləri doktoru Elyor Kərimov Xəzər Universitetində «Orta Asiyada sufi təriqətləri» mövzusunda məruzə edib.

Tədbirə AMEA Məhəmməd Füzuli adına Əlyazmalar İnstitutunun, Tarix İnstitutunun və Fəlsəfə və Sosiologiya İnstitutunun əməkdaşları, Xəzər Universitetinin müəllim və tələbələri qatılıblar.

Xəzər Universiteti Mövlana Ədəbi-Fəlsəfi Araşdırmalar İnstitutunun direktoru Nəzakət Məmmədli qonağı və iştirakçıları salamlayaraq bildirib ki, Orta Asiyada yaranan sufi təriqətləri Nəsimi, Seyyid Yəhya Bakuvi, Məhəmməd Füzuli və s. şairlərimizin yaradıcılığına, Azərbaycan fəlsəfi fikrinin formalaşmasına təsir göstərib. Hətta 19-cu əsr böyük sufi şairi Mir Həmzə Seyyid Nigari Qarabaği Buxarada yaşamış Bəhaəddin Nəqşbəndinin mənəvi davamçısı olduğunu qeyd edib.

E. Kərimov məruzəsində Orta Asiyada təşəkkül tapmış və bütün dünyaya yayılmış yəsəvilik, kübrəvilik, nəqşbəndilik və s. təriqətlərin yaranma tarixindən, ideoloji əsaslarından, nümayəndələrindən, həmçinin Yusif Həmədani, Əhməd Yəsəvi, Nəcməddin Kübra, Übeydullah Əhrar, Əbdürrəhman Cami və s. dahi şəxsiyyətlərin həyat yolundan, fəaliyyətindən, yaradıcılığından bəhs edib. Sonda iştirakçıların mövzu ətrafında suallarını cavablandırılıb.

Qeyd edək ki, professor E. Kərimov UNESKO-nun Ümumdünya Yaddaş Reyestrinin Alt Komitəsinin üzvü, YUNESKO tərəfindən nəşr olunmuş «Mərkəzi Asiya sivilizasiyalarının tarixi» çoxcildliyinin müəllifidir.