2023-cü il noyabrın 2-3-də Xəzər Universiteti Beynəlxalq Əlaqələr Şöbəsinin müdiri Fatimə Vəliyeva Alman Akademik Mübadilə Xidmətinin (DAAD) Tbilisi Regional Ofisi tərəfindən 15 Cənubi Qafqaz universitetinin beynəlxalq ofis rəhbərləri üçün keçirilən “Beynəlmiləlləşmə Strategiyalarının Hazırlanması” mövzusunda vörkşopda iştirak edib.

DAAD ilə Almaniya Rektorlar Konfransının (HRK) birgə təşkilatçılığı ilə keçirilən bu vörkşop Avropa İttifaqının maliyyələşdirdiyi FU4Dialogue layihəsi çərçivəsində baş tutub.

Vörkşop müddətində Sapienza Universitetinin (İtaliya), Eötvöş Lorand Universitetinin (Macarıstan), Lumière Lyon 2 Universitetinin (Fransa) professorları onlayn şəkildə Beynəlmiləlləşmə istiqamətində öz təcrübələrini bölüşüblər. İki gün ərzində alimlər “Beynəlmiləlləşmə və dayanıqlılıq“, “Tədqiqatda beynəlmiləlləşmə“, “Beynəlmiləlləşmədə dil siyasətinin rolu“ kimi müxtəlif mövzularda fikir mübadiləsi aparıblar və müzakirə prosesində qrup olaraq təqdimatla çıxış ediblər.

Sonda Universitet nümayəndələri DAAD Tbilisi Regional Ofisinin fəaliyyəti ilə tanış olublar.