2023-cü il oktyabrın 13-də Xəzər Universiteti İngilis dili və ədəbiyyatı departamentinin tələbə və müəllim heyətinin “Qanun” nəşriyyatının direktoru Şahbaz Xuduoğlu ilə görüşü təşkil edilib. Tədbir Xəzər Universitetində yeni yaradılmış “Tərcümə mərkəzi”nin koordinatoru Elvin Abbasbəylinin təşəbbüsü və İngilis dili və ədəbiyyatı departamentinin müdiri Milana Abbasovanın dəstəyi ilə keçirilib.
Tədbiri giriş sözü ilə açan Milana Abbasova departament haqqında qısa məlumat verib. Elvin Abbasbəyli “Tərcümə mərkəzi”nin yaradılma səbəbi və gələcək planları haqqında danışıb. Sonra çıxış edən Şahbaz Xuduoğlu “Qanun” nəşriyyatının yaradılmasından, tərcüməçi peşəsindən, eləcə də nəşr sahəsi ilə bağlı redaktor və korrektor işinin xüsusiyyətlərindən bəhs edib. Tərcüməçinin kitabın ikinci müəllifi olduğunu və buna görə də işinə məsuliyyətlə yanaşmasının zəruriliyini qeyd edən naşir daha sonra tələbələrin suallarını cavablandırıb.
Görüşdən sonra Xəzər Universitetinin “Qanun” nəşriyyatı ilə gələcək əməkdaşlığı müzakirə edilib.