2023-cü il oktyabrın 12-də Xəzər Universiteti Karyera Mərkəzinin təşkilatçılığı ilə AİESEC-in Azərbaycan nümayəndəliyi “AİESEC Azərbaycan”ın əməkdaşları Xəzər Universitetində oldular. Keçirilən tədbirdə onlar “AİESEC Azərbaycan” haqqında ümumi məlumat verdilər.
Qeyd edək ki, AİESEC təşkilatı dünyanın 110 ölkəsində 1300-dən çox universitetin tələbə və məzunlarını əhatə edən, BMT-də məsləhətçi statusu olan ən böyük tələbə təşkilatıdır. Azərbayacan Respublikası AİESEC beynəlxalq təşkilatına üzvlüyün əhəmiyyətini və gənclərin inkişafına təsirini nəzərə olaraq, bu təşkilata 2006-cı ildə Gənclər və İdman Nazirliyi vasitəsilə üzv olub, 2009-cu ildə isə “AİESEC Azərbaycan” beynəlxalq staj keçmə proqramının tam hüquqlu üzvü statusu əldə edib
Tədbirdə tələbələrə “Global Talent”, “Global Teacher”, ”Global Volunteer” və “Global Host” layihələri haqqında məlumat verildi. “Global Talent” layihəsi dünya miqyasında bir çox müxtəlif sahələrdə təcrübə və mübadilə proqramları təklif etməklə peşəkar inkişaf imkanları yaradır. “Global Teacher” layihəsi xaricdə təhsil imkanları təmin etməklə təhsilin keyfiyyətini yüksəltmək məqsədi daşıyır. “Global Volunteer” BMT-nin Dayanıqlı İnkişaf Məqsədləri üzərində əsaslanmış könüllü təcrübə proqramıdır. ”Global Host” layihəsi isə xaricdən mübadilə proqramı ilə gələn xarici tələbələrə ev sahibliyi edərək, yeni mədəniyyətləri tanımaq imkanı yaradır.
Tədbir zamanı layihə iştirakçılarının hansı ölkələrdə hansı proqramlarda iştirak etdiyi haqda məlumat verildi. Murad Rzayev özünün Ruminiyada “Global Volunteer” layihəsində qazandığı təcrübə haqqında ətraflı danışdı.
Sonda tələbələrin sualları cavablandırıldı.