2023-cü il oktyabrın 7-də Xəzər Universitetinin Tarix və arxeologiya departamentinin müəllimi, PhD namizədi Orxan Zamanovun təşəbbüsü və təşkilatçılığı ilə birinci kurs tələbələri AMEA Arxeologiya, Etnoqrafiya və Antropologiya İnstitutunun Muzey-sərgi zalında “Arxeologiya və etnoqrafiyanın əsasları” fənni üzrə təşkil olunmuş arxeoloji ekskurs-dərsdə iştirak etmişlər. Qeyd etmək lazımdır ki, bu fənn PhD Y.Məmmədov ilə birlikdə tədris olunur və AR Təhsil Nazirliyinin zəruri fənlərindəndir.
Dərsdə tələbələrə Azərbaycan arxeologiyasının keçdiyi tarixi yol, bu elm sahəsinin Azərbaycanda təşəkkülü, aparılan tədqiqatlar və bu araşdırmaların milli maraqlara dəstəyi barədə danışılmış, Muzey-sərgi zalının strukturu izah edilmişdir.
Tələbələrə arxeologiya elminin əyani tədrisi məqsədilə təşkil olunmuş ekskurs-dərsdə daş dövründən orta əsrlərə kimi Azərbaycanda mövcud olmuş və arxeoloji çöl tədqiqatları nəticəsində əsasən müstəqillik illərində aşkara çıxarılmış eksponatlar barədə geniş məlumat verilmişdir. Böyük maraqla qarşılanan ekskursiya tələbələrin sualları və müzakirələri ilə yekunlaşmışdır.