Xəzər Universiteti Tarix və arxeologiya departamentinin müdiri t.ü.f.d. Telman Nüsrətoğlu və Əkbər Nəcəfin birgə hazırladığı “Türk dövlətləri və mədəniyyətləri tarixi” kitabı çapdan çıxıb. Ali məktəblər üçün dərs vəsaiti olaraq nəzərdə tutulan kitab Azərbaycanda elmi cəhətdən mühüm bir boşluğu doldurmaqdadır. Əsər təkcə tarix ixtisası üzrə təhsil alan bakalavriat, magistratura və doktorantura tələbələri üçün deyil, eyni zamanda türk tarixi haqqında ümumi və əhatəli məlumat almaq istəyən hər kəs üçün tövsiyə olunur. Səkkiz yüz səhifəlik kitabda ən qədim dövrlərdən XX əsrə qədər Asiya, Afrika və Avropada yaranmış türk dövlətləri haqqında, o cümlədən siyasi, sosial, iqtisadi, mədəni və daha bir çox sahədə ətraflı məlumat tapmaq mümkündür.

Əsərin ən böyük üstünlüyü ciddi və əhatəli milli konsepsiya əsasında yazılmasıdır. Kitabda türklərin coğrafiyası, təməl xüsusiyyətləri, tarixə çıxışı, hunlar, moğollar, səlcuqlular, türk tarixinin mənbələri, türk dünyasında müasirləşmə kimi olduqca böyük əhəmiyyətə malik mövzulara yer verilmişdir. “Türk dövlətləri və mədəniyyətləri tarixi” kitabı Türk tarixinin mühüm bir tərkib hissəsi olan Azərbaycan tarixi baxımından da önəmli bir müraciət mənbəyi olaraq artıq Azərbaycan tarixşünaslığındakı yerini almışdır.