2023-cü il sentyabrın 28-də Elmi Şuranın yeni dərs ilində ilk iclasını universitetin rektoru Dos. İradə Xəlilova açaraq, gündəlikdəki məsələləri şura üzvlərinin nəzərinə çatdırdı.
Gündəliyin birinci məsələsi olaraq iclasın sədri Elmi Şura üzvlərini Xəzər Universitetinin Elmi Şurasının yeni tərkibi ilə tanış etdi.
Gündəliyin ikinci məsələsi olan məzunlar haqqında məlumatlar Təbiət elmləri və mühəndislik fakültəsinin dekanı Fəxrəndə Əfəndiyeva, İqtisadiyyat və menecment fakültəsinin əməkdaşı Xanım Öməroğlu, Humanitar, təhsil və sosial elmlər fakültəsinin dekanı Elza Səmədova və İqtisadiyyat və biznes yüksək təhsil fakültəsinin dekanı İnqilab Əhmədov tərəfindən təqdim olundu. Universitetin məzun olan bakalavriatura və magistratura tələbələri, onların qiymətləri, ixtisasları və s. haqqında ətraflı məlumat dinlənildi və müzakirələr aparıldı.
Üçüncü məsələ ilə əlaqədar fakültə dekanları Xəzər Universitetinə qəbul olan tələbələr haqqında statistik məlumat verərək qeyd etdilər ki, tələbə qəbulunda artım müşahidə olunmuşdur.
Gündəliyin dördüncü məsələsi olaraq İqtisadiyyat və biznes yüksək təhsil fakültəsinin dekanı İnqilab Əhmədov tərəfindən şura üzvlərinə magistratura tələbələrinin tezis mövzuları və elmi rəhbərləri barədə məlumat verildi.
Gündəlikdəki beşinci məsələ olan fəlsəfə doktorluğu proqramı üzrə növbəti il üçün doktorantura və dissertanturaya qəbul planı haqqında rektor dosent İradə Xəlilova tərəfindən şura üzvlərinə məlumat verildi.
Doktorant və dissertantların dissertasiya mövzularının, elmi rəhbərlərinin təsdiqi və dəyişdirilməsi haqqında (altıncı məsələ) Təbiət elmləri, sənət və texnologiya yüksək təhsil fakültəsi və İqtisadiyyat və biznes yüksək təhsil fakültəsinin dekanları tərəfindən məlumat verildi.
Gündəliyin yeddinci məsələsi olaraq Xəzər Universitetinin İdarəetmə və tələbə işləri üzrə prorektoru, Dillər və ədəbiyyatlar departamentinin professoru, fil.e.d. İsaxan İsaxanlının “Azərbaycan-rus ədəbi əlaqələri (Serqey Yesenin və Azərbaycan)” adlı monoqrafiyasının çapa təqdim olunması haqqında məlumat şuranın elmi katibi Günel Bahəddinova tərəfindən təqdim olundu.
Elmi Şuranın növbəti – səkkizinci məsələsi Tarix və arxeologiya departamentinin müdiri t.ü.f.d. Telman Nüsrətoğlu Quliyevin dosent adının verilməsi üçün Azərbaycan Respublikası Prezidenti yanında Ali Attestasiya Komissiyası qarşısında vəsatət qaldırılması ilə bağlı universitetin Elmi Şurasına müraciəti müzakirə olundu. Elmi Şuranın katibi iddiaçı haqqında ətraflı məlumat verdi. Hesablama komissiyası yaradılaraq, gizli səsvermə keçirildi. Nəticə şura üzvlərinə açıqlanaraq protokol tərtib edildi.
Cari məsələlər qismində rektor dosent İradə Xəlilova Elmi Şuranın 2023-2024-cü tədris ili üçün fəaliyyət planı haqqında məlumat verdi. Departamentlərə elmi fəaliyyətlərinin daha aktiv formada aparılması və Elm və Təhsil Nazirliyinin tələbinə əsasən illik elmi hesabatların hazırlanması tapşırıldı.
Elmi şuranın gündəliyindəki məsələlərlə bağlı müsbət qərarlar qəbul edildi.