2023-ci il sentyabrın 28-də Xəzər Universitetinin Beynəlxalq əlaqələr şöbəsi universitetə yeni qəbul olunmuş əcnəbi tələbələr üçün oriyentasiya günü keçirdi. Tədbir zamanı yeni gələn tələbələr qayda və prosedurlar barədə məlumat, habelə, Azərbaycanda yaşamaq üçün faydalı tövsiyələr əldə etdilər.

Xəzər Universitetinin rektoru Dos. İradə Xəlilova və Beynəlxalq əlaqələr üzrə prorektor Vlad Vernygora`nın tələbələri salamlaması və onlara universitet həyatında uğurlar arzulaması ilə başlanan tədbirdə İqtisadiyyat və menecment fakültəsinin nümayəndəsi Bahar İmanova, Təbiət elmləri və mühəndislik fakültəsinin nümayəndəsi, Kompüter elmləri departamentinin koordinatoru Cavad Mehri Tekmeh, Humanitar, təhsil və sosial elmlər fakültəsinin nümayəndəsi Tərlan Orucova əcnəbi tələbələrə tədris prosesinə aid zəruri məlumatlar verdilər. Tələbələrin bir-birlərini tanımasına imkan yaradan əyləncəli oyun təşkil edildi.

Beynəlxalq əlaqələr ofisinin koordinatoru Arzu Bədəlova tərəfindən tələbələrə Xəzər Universiteti haqqında təqdimat nümayiş etdirildi. Ofisin koordinatoru Turan Əlizadə miqrasiya məsələlərinə dair tələbələri məlumatlandırdı.

Universitetdə artıq təhsil alan əcnəbi tələbələr də öz təcrübələrini, Azərbaycan haqqında biliklərini yeni tələbələrlə bölüşdülər. Əlavə olaraq, tədbirdə iştirakı baş tutmayan tələbələrin qısa videomesajları təqdim edildi.

Sonda tədbirdə iştirak edən tələbələrə Xəzər Universiteti adından hədiyyələr verildi.