2023-cü il sentyabrın 15-də Xəzər Universitetində Həyat elmləri departamentinin təşkilatçılığı ilə Hasvet Medikal şirkətinin əməkdaşları ilə görüş keçirildi. Hasvet Bakı Beynəlxalq Heyvan Xəstəxanası (Hasvet Baku International Animal Hospital) 1 ilə yaxındır öz mütəxəssis heyəti ilə (yerli və türk baytar həkimlər) Bakı şəhərində fəaliyyətə başlamışdır. Xəstəxanada müxtəlif tipli əməliyyatlar, tomoqrafiya, endoskopiya, rentgen, ultrasəs, ümumi qan analizi, biokimyəvi və hormon analizləri, sitoloji diaqnostika, anesteziya, reanimasiya, həmçinin ev heyvanları üçün özəl baxım kimi xidmətlər göstərilir.
Görüşdə Xəzər Universitetinin rektoru İradə Xəlilova, Həyat elmləri departamentinin müdiri Cəmalə Eldarova, departamentin dosenti Cavid Ocaqi, Hasvet Bakı Beynəlxalq Heyvan Xəstəxanasının direktor müavini Mehmet Koçak, koordinatoru Y.Emre Büyükballı, həmçinin xəstəxananın baytar həkimi və Xəzər Universitetinin Həyat elmləri departamentinin müəllimi Çiçək Əliyeva iştirak etdilər.
Görüşdə baytarlıq klinikalarının qurulması, xəstəxana ləvazimatlarının, laboratoriya cihazlarının, heyvan dərmanlarının, yemlərinin və s. istehsalı kimi müxtəlif sahələrdə uğurlu fəaliyyət göstərən, Türkiyənin bir çox bölgələrində mərkəzləri olan Hasvet Medikal şirkəti, onun missiyası və fəaliyyət sahələri haqqında geniş təqdimat olundu. Bundan əlavə, tərəflər arasında əməkdaşlıq əlaqələrinin möhkəmləndirilməsi, Xəzər Universitetində Baytarlıq Klinikasının qurulması və onun idarəçiliyi ilə əlaqəli məsləhətlərin verilməsi, eyni zamanda təlimlərin təşkil olunması kimi məsələlər müzakirə olundu. Həmçinin, Xəzər Universitetində Baytarlıq təbabəti ixtisası üzrə təhsil alan tələbələrin bəzi təcrübə dərslərinin Hasvet Bakı Beynəlxalq Heyvan Xəstəxanasında tədris olunması üçün tərəflər arasında memorandumun imzalanması qərara alındı.