Təbiət elmləri, sənət və texnologiya yüksək təhsil fakültəsinin dekan müavini b.ü.f.d. Məhəmməd Eldarov və Həyat elmləri departamentinin dosenti Cavid Ocaqi "Azərbaycanda mədəni bitkilərin yabanı əcdadlarının in situ yayılması və populyasiya strukturunun öyrənilməsi" məqsədilə 2023-cü il iyulun 17-24-də Azarbaycanın cənub bölgəsinə (Cəlilabad, Masallı, Lənkəran, Astara, Lerik), Dağlıq Şirvan və Böyük Qafqazın şimal bölgələrinə (Şamaxı, İsmayıllı, Qəbələ, Oğuz, Şəki) elmi ekspedisiyada olmuşlar.

Ekspedisiya zamanı 25 marşrut üzrə 100-dən çox mədəni bitkilərin yabanı əcdadlarına aid olan (buğda, arpa, yulaf, sorgo, vələmir, çovar, lərgə, qarayonca, gülülcə, xaşa, üçyarpaq yonca, gəvən, yabanı soğan, yabanı yerkökü, yabanı alma və s.) bitkilərin populyasiyaları tədqiq olunmuş və bir çox bitkilərin isə yeni yayılma arealları müəyyənləşdirilmişdir.

Toplanmış bitkilərin məlumatları beynəlxalq deskriptor forması üzrə qeyd olunmuş və üçölçülü məkan göstəriciləri GPS cihazı vasitəsilə müəyyən edilmişdir. Ekspedisiya zamanı in situ halda populyasiyalarının yayılma strukturu Beynəlxalq Təbiətin və Təbii Sərvətlərin Mühafizəsi Birliyinin meyarları (kateqoriya və kriteriyalar) əsasında öyrənilmişdir.